మహిళా ఉద్యోగుల భద్రతే లక్ష్యం: అచ్యుతాపురం 'బ్రాండిక్స్'లో 1000 మందితో భారీ అవగాహన సదస్సు.
క్రైమ్9మీడియా ప్రతినిధి జోనల్ ఇంచార్జి పి మహేశ్వరావు.
అనకాపల్లి(అచ్యుతాపురం)
జూలై:08 పరిశ్రమల్లో పనిచేసే మహిళా ఉద్యోగుల భద్రతకు అత్యంత ప్రాధాన్యత ఇస్తున్నామని, వారి రక్షణే జిల్లా పోలీసు యంత్రాంగం తొలి ప్రాధాన్యత అని అధికారులు స్పష్టం చేశారు. జిల్లా ఎస్పీ తుహిన్ సిన్హా ఆదేశాల మేరకు, అనకాపల్లి మహిళా పోలీస్ స్టేషన్ డీఎస్పీ ఈ.శ్రీనివాసులు ఆధ్వర్యంలో అచ్యుతాపురం బ్రాండిక్స్ కంపెనీ లోని యూనిట్ 2 లో మహిళా ఉద్యోగులకు చట్టాలు, రక్షణ, మార్గాలపై ప్రత్యేక అవగాహన సదస్సు నిర్వహించారు.
ఈ సదస్సులో అచ్యుతాపురం ఎంపీడీఓ చైతన్య, తహశీల్దార్ శ్రీనివాసరావు, అచ్యుతాపురం సిఐ చంద్రశేఖర్, ఎస్ఐ సుధాకర్, డబ్ల్యూఎస్ఐ పోషణ గౌరీ పాల్గొనగా, సుమారు 1000 మంది మహిళా ఉద్యోగులు హాజరయ్యారు. ఈ సందర్భంగా మహిళలకు గృహ హింస, పని ప్రదేశాలలో వేధింపులు, సైబర్ నేరాలు మరియు మైనర్ పిల్లల సంరక్షణపై చట్టాల గురించి విస్తృతంగా అవగాహన కల్పించారు.మహిళా పోలీస్ స్టేషన్ డీఎస్పీ ఈ.శ్రీనివాసులు మాట్లాడుతూ
"మహిళలు ఏ రంగంలో ఉన్నా వారి ఆత్మగౌరవానికి, భద్రతకు భంగం కలగకూడదనేదే మా సంకల్పం. గృహ హింస, పని ప్రదేశాలలో వేధింపులు ఎదురైనప్పుడు మహిళలు మౌనంగా భరించకూడదు. చట్టం కల్పించిన రక్షణలను ఉపయోగించుకుని ధైర్యంగా ముందుకు రావాలి. ముఖ్యంగా ప్రస్తుత డిజిటల్ యుగంలో సైబర్ మోసాలు విపరీతంగా పెరుగుతున్నాయి. సామాజిక మాధ్యమాలలో గుర్తుతెలియని వ్యక్తులకు మీ వ్యక్తిగత సమాచారం, ఫోటోలు, బ్యాంక్ వివరాలు షేర్ చేయవద్దు. అలాగే, మీ మైనర్ పిల్లల పట్ల ప్రత్యేక శ్రద్ధ వహించాలి, వారి ప్రవర్తనను గమనిస్తూ సురక్షిత వాతావరణంలో పెంచాలి. అత్యవసర పరిస్థితుల్లో ప్రతి మహిళా ఉద్యోగి మొబైల్లో 'శక్తి' యాప్ ఉండాలి. ఒక్క బటన్ నొక్కితే నిమిషాల వ్యవధిలో పోలీసు సహాయం మీ వద్దకు చేరుకుంటుంది. మీ వివరాలు అత్యంత గోప్యంగా ఉంచబడతాయి."
అచ్యుతాపురం సిఐ చంద్రశేఖర్ మాట్లాడుతూ.
"పని ప్రదేశాల్లో లేదా బయట ఎక్కడైనా సరే వేధింపులు, ఈవ్ టీజింగ్ వంటి ఘటనలు ఎదురైతే ఏమాత్రం భయపడకుండా వెంటనే పోలీసులను ఆశ్రయించండి. అత్యవసర సమయాల్లో మహిళలకు, పిల్లల రక్షణకు ప్రభుత్వం కేటాయించిన డయల్ 100/112, 1098 (చైల్డ్ లైన్), 181 (మహిళా హెల్ప్లైన్) నంబర్లను సంప్రదించి తక్షణ సహాయం పొందవచ్చు. మౌనంగా భరించకండి, మేము మీకు సహాయం చేయడానికి సిద్ధంగా ఉన్నాము అనే నినాదంతో పోలీసులు ఎల్లప్పుడూ మీకు రక్షణ కవచంలా అందుబాటులో ఉంటారు."
అనంతరం మహిళా ఉద్యోగులు అడిగిన పలు సందేహాలను మరియు చట్టపరమైన ప్రశ్నలను అధికారులు నివృత్తి చేశారు. ఈ కార్యక్రమంలో కంపెనీ ప్రతినిధులు, పోలీసు సిబ్బంది మరియు పెద్ద సంఖ్యలో మహిళా ఉద్యోగులు పాల్గొన్నారు.