ఆర్టీసీ కాంప్లెక్స్ సమీపంలో విషాదం.. ట్రాక్టర్ను ఢీకొని వ్యక్తి మృతి.
క్రైమ్ 9 మీడియా ప్రతినిధి శ్రీకాకుళం జిల్లా స్టాఫ్ రిపోర్టర్ శంకర్ తమ్మినాన.
పలాస, జూన్ 22 :
పలాస పట్టణంలోని ఆర్టీసీ కాంప్లెక్స్ సమీపంలో సోమవారం జరిగిన రోడ్డు ప్రమాదంలో ఓ వ్యక్తి మృతి చెందడంతో స్థానికంగా విషాద ఛాయలు అలుముకున్నాయి. స్థానికులు తెలిపిన వివరాల మేరకు, మున్సిపల్ వీధికి చెందిన కుమ్మరి రామారావు రోడ్డుపై వెళ్తున్న సమయంలో అక్కడ నిలిపి ఉంచిన మున్సిపల్ ట్రాక్టర్ను అనుకోకుండా ఢీకొన్నట్లు సమాచారం.
ప్రమాదంలో తీవ్రంగా గాయపడిన రామారావును గమనించిన సమీపంలోని ఆటో యూనియన్ సభ్యులు వెంటనే స్పందించి చికిత్స నిమిత్తం పలాస ప్రభుత్వ ఆసుపత్రికి తరలించారు. అనంతరం మెరుగైన వైద్యం అందించినప్పటికీ పరిస్థితి విషమించడంతో ఆయన మృతి చెందినట్లు వైద్య వర్గాలు తెలిపాయి.
ఘటనపై సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిశీలించారు. ప్రమాదానికి గల కారణాలపై కేసు నమోదు చేసి దర్యాప్తు చేపట్టారు. ట్రాక్టర్ రోడ్డుపై నిలిపి ఉంచిన విధానం, ప్రమాదం జరిగిన పరిస్థితులపై విచారణ కొనసాగిస్తున్నట్లు తెలిసింది.
రామారావు మృతితో ఆయన కుటుంబ సభ్యులు, బంధువులు తీవ్ర శోకసంద్రంలో మునిగిపోయారు. మృతుడు స్థానికంగా సౌమ్య స్వభావం కలిగిన వ్యక్తిగా పేరుపొందినట్లు స్థానికులు పేర్కొన్నారు. ఈ ఘటనపై పలువురు ఆవేదన వ్యక్తం చేస్తూ రహదారులపై వాహనాలను నిర్లక్ష్యంగా నిలిపివేయకుండా అధికారులు చర్యలు తీసుకోవాలని కోరారు.