ఏపీ టిడ్కో లబ్ధిదారులకు రూ.4.17 కోట్ల చెక్కుల పంపిణీ.
1,149 మంది లబ్ధిదారులకు ఊరట కల్పించిన ప్రభుత్వం.
క్రైమ్ 9 మీడియా ప్రతినిధి శ్రీకాకుళం జిల్లా స్టాఫ్ రిపోర్టర్ శంకర్ తమ్మినాన.
పలాస, జూన్ 24: పలాస-కాశీబుగ్గ పురపాలక సంఘ పరిధిలో ఏపీ టిడ్కో–ప్రధాన మంత్రి ఆవాస్ యోజన (PMAY-U) పథకం కింద గృహాల కోసం దరఖాస్తు చేసుకుని, డిమాండ్ డ్రాఫ్టుల రూపంలో నగదు చెల్లించినప్పటికీ గృహాలు మంజూరు కాకపోయిన లబ్ధిదారులకు ప్రభుత్వం చెల్లించిన మొత్తాలను తిరిగి అందజేసే కార్యక్రమం బుధవారం ఘనంగా నిర్వహించబడింది.
ఈ కార్యక్రమంలో పలాస శాసనసభ్యురాలు శ్రీమతి గౌతు శిరీష ముఖ్య అతిథిగా పాల్గొని 1,149 మంది లబ్ధిదారులకు మొత్తం రూ.4,17,40,000 విలువైన చెక్కులను పంపిణీ చేశారు. గతంలో 300, 365 మరియు 430 చదరపు అడుగుల టిడ్కో గృహాల కోసం దరఖాస్తు చేసుకుని వివిధ కారణాల వల్ల గృహాలు మంజూరు కాకపోయిన లబ్ధిదారులు చెల్లించిన మొత్తాలను ప్రభుత్వం తిరిగి చెల్లించడం పట్ల వారు హర్షం వ్యక్తం చేశారు.
అధికారులు లబ్ధిదారులు సమర్పించిన డిమాండ్ డ్రాఫ్టులు, మున్సిపల్ రసీదులు, ఇతర సంబంధిత పత్రాలను క్షుణ్ణంగా పరిశీలించి అర్హుల జాబితాను ప్రభుత్వానికి పంపించగా, ప్రభుత్వం వాటిని ఆమోదించి నిధుల విడుదలకు చర్యలు చేపట్టింది. దీంతో ఎన్నో సంవత్సరాలుగా తమ సొమ్ము తిరిగి వస్తుందా అనే ఆందోళనలో ఉన్న లబ్ధిదారులకు ఈ చెక్కుల పంపిణీ ద్వారా గణనీయమైన ఉపశమనం లభించింది.
ఈ సందర్భంగా ఎమ్మెల్యే గౌతు శిరీష మాట్లాడుతూ, ప్రజల కష్టార్జిత ధనం వారికి తిరిగి అందేలా కూటమి ప్రభుత్వం ప్రత్యేక శ్రద్ధతో పనిచేస్తోందన్నారు. ప్రజల సమస్యలను గుర్తించి వేగవంతంగా పరిష్కరించడం ప్రభుత్వ ప్రధాన లక్ష్యమని పేర్కొన్నారు. అర్హులైన ప్రతి ఒక్కరికీ న్యాయం జరిగేలా పారదర్శక విధానాలతో చర్యలు తీసుకుంటున్నామని తెలిపారు.
గత ప్రభుత్వ హయాంలో వివిధ కారణాలతో నిలిచిపోయిన సమస్యలను పరిష్కరించేందుకు ప్రస్తుత ప్రభుత్వం కట్టుబడి ఉందని, ప్రజలకు ఇచ్చిన హామీల అమలులో రాజీ పడబోదని ఎమ్మెల్యే స్పష్టం చేశారు. ప్రజా సంక్షేమం, గృహ వసతి, మౌలిక సదుపాయాల అభివృద్ధికి ప్రభుత్వం అత్యంత ప్రాధాన్యత ఇస్తోందని పేర్కొన్నారు.
లబ్ధిదారులు కూడా తమకు చెల్లించిన మొత్తాలు తిరిగి అందడం పట్ల సంతోషం వ్యక్తం చేస్తూ ప్రభుత్వం, స్థానిక ప్రజాప్రతినిధులకు కృతజ్ఞతలు తెలిపారు. ఈ కార్యక్రమం ద్వారా ప్రభుత్వంపై ప్రజల్లో మరింత విశ్వాసం పెరిగిందని పలువురు అభిప్రాయపడ్డారు.
ఈ కార్యక్రమంలో ఏపీటీపీసీ చైర్మన్ వజ్జ బాబూరావు, ఏఎంసీ చైర్మన్ మల్ల శ్రీనివాస్, గ్రంథాలయ సంస్థ చైర్మన్ పీరికట్ల విఠల్, బీసీ సెల్ అధ్యక్షుడు లోడగల కామేష్, గాలి కృష్ణారావు, చిన్ని, గురుటి సూర్యనారాయణ, కోరికాన శంకర్, కూటమి నాయకులు, వార్డు సభ్యులు, మున్సిపల్ అధికారులు, సంబంధిత శాఖల అధికారులు, పెద్ద సంఖ్యలో లబ్ధిదారులు పాల్గొన్నారు.