క్రైమ్ 9మీడియా ప్రతినిధి. జిల్లా ఇంచార్జి రిపోర్టర్ (క్రైమ్).
పి. మహేశ్వరరావు.అనకాపల్లి, నవంబర్ 28: అనకాపల్లి జిల్లా పోలీస్ శాఖలో ‘పోలీసు వెల్ఫేర్ డే’ ను శుక్రవారం జిల్లా ఎస్పీ తుహిన్ సిన్హా, ఐపీఎస్ స్వయంగా పాల్గొని, పర్యవేక్షణలో ఘనంగా నిర్వహించారు. జిల్లా వ్యాప్తంగా విధులు నిర్వర్తిస్తున్న పోలీసు సిబ్బంది వ్యక్తిగత, కుటుంబ మరియు వృత్తి సంబంధిత సమస్యలను తెలుసుకుని, వాటికి తక్షణ పరిష్కారాలను అందించడమే ఈ కార్యక్రమం ప్రధాన ఉద్దేశ్యం.
ఈ సందర్భంగా ఎస్పీ తుహిన్ సిన్హా మాట్లాడుతూ—
“పోలీసు సిబ్బంది శ్రేయస్సు మా శాఖ యొక్క అత్యంత ముఖ్య లక్ష్యం. రోజువారీ కఠిన విధులు నిర్వహించే సిబ్బందికి పూర్తి స్థాయి మద్దతు ఇవ్వడం, వారి ఆరోగ్యం, కుటుంబ సంక్షేమం మరియు సేవా అవసరాలపై నిరంతర శ్రద్ధ చూపడం మా బాధ్యత. సిబ్బంది సమస్యలను వేగంగా, పారదర్శకంగా పరిష్కరించడం మా ప్రధాన కర్తవ్యంగా భావిస్తున్నాం” అని అన్నారు.
వెల్ఫేర్ డే సందర్భంగా ఎస్పీ ప్రతి సిబ్బందిని వ్యక్తిగతంగా కలిసి, వారు తెలిపిన సమస్యలను శ్రద్ధగా విని, సంబంధిత శాఖాధికారులకు వెంటనే పంపించారు. అందరికీ అవసరమైన చర్యలు త్వరితగతిన తీసుకోవాలని ఆదేశాలు జారీ చేశారు.
“పోలీసు సిబ్బంది సంక్షేమం కోసం నేను ఎప్పుడూ అందుబాటులోనే ఉంటాను. ఏ సమస్య అయినా ఎలాంటి సంకోచం లేకుండా తెలియజేయాలని కోరుకుంటున్నాను. మీ ధైర్యం, నిబద్ధత, సామర్థ్యాన్ని పెంపొందించేందుకు మన వెల్ఫేర్ కార్యక్రమాలు నిరంతరాయంగా కొనసాగుతాయి” అని పేర్కొన్నారు.
ఈ కార్యక్రమం పోలీసు సిబ్బందిలో నమ్మకం, ఉత్సాహం పెంచి, సేవా భావంతో మరింత సమర్థంగా పనిచేయడానికి ప్రేరణనిచ్చింది.