అభివృద్ధిపై బహిరంగ చర్చకి సిద్ధమా..?
గౌతు శిరీష పై ప్రతిపక్ష వైసీపీ నాయకులు ధ్వజం.
క్రైమ్ 9 మీడియా ప్రతినిధి శ్రీకాకుళం జిల్లా స్టాఫ్ రిపోర్టర్ శంకర్ తమ్మినాన.
పలాస, మే 22: పలాస నియోజకవర్గ శాసనసభ్యురాలు (ఎమ్మెల్యే) గౌతు శిరీషపై ప్రతిపక్ష వైఎస్సార్సీపీ నాయకులు తీవ్రస్థాయిలో ధ్వజమెత్తారు. మీడియా సమావేశాల్లో ఆమె మాట్లాడుతున్న తీరు బాధ్యతాయుతంగా లేదని, ప్రజలకు మంచి సందేశం ఇవ్వాల్సింది పోయి తీవ్ర అసహనంతో, కోపంతో ఊగిపోతున్నారని విమర్శించారు.
సర్వేల్లో వెనుకబడటం వల్లే ఆందోళన: వైఎస్సార్సీపీ
కూటమి ప్రభుత్వం, టీడీపీ అధినేత చంద్రబాబు నాయుడు నిరంతరం నిర్వహిస్తున్న అంతర్గత సర్వేల్లో ఎమ్మెల్యే శిరీష 174 లేదా 175వ స్థానానికి పడిపోయారని, ఆ భయంతోనే ఆందోళన చెందుతూ ప్రెస్ మీట్లలో అసహనం వ్యక్తం చేస్తున్నారని వైఎస్సార్సీపీ నేతలు ఎద్దేవా చేశారు. తమ పార్టీ అధినేత వైఎస్ జగన్ మోహన్ రెడ్డి, మాజీ మంత్రి సీదిరి అప్పలరాజులపై ఆమె చేస్తున్న వ్యాఖ్యలను తీవ్రంగా ఖండించారు.
అభివృద్ధిపై బహిరంగ సవాల్
గత 60 ఏళ్ల పాలనలో పలాస నియోజకవర్గానికి ఏం చేశారో చెప్పాలని ఎమ్మెల్యేను ప్రశ్నించారు. వైఎస్సార్సీపీ ఐదేళ్ల పాలనలో 'నాడు-నేడు' ద్వారా ప్రభుత్వ పాఠశాలలను ప్రైవేటుకు దీటుగా కార్పొరేట్ స్థాయిలో మార్చామని, ఇంగ్లీష్ మీడియం, సీబీఎస్ఈ సిలబస్ తెచ్చామని గుర్తు చేశారు. పలాసలో ప్రతిష్టాత్మక కిడ్నీ రీసెర్చ్ ఆసుపత్రికి పునాది వేసి, ప్రారంభించింది వైఎస్సార్సీపీ ప్రభుత్వమేనని, ఆ క్రెడిట్ మాజీ మంత్రి అప్పలరాజుదేనని స్పష్టం చేశారు. ఎమ్మెల్యే గొప్పగా చెప్పుకుంటున్న కేంద్రీయ విద్యాలయం కేవలం తాత్కాలిక భవనంలో 150 మంది విద్యార్థులతో నడుస్తోందని, దానికి శాశ్వత భవనాలే లేవని విమర్శించారు.
"చంద్రబాబు నాయుడు 'సంపద సృష్టి' గురించి మాట్లాడుతుంటే, పలాసలో మాత్రం కూటమి నాయకులు సహజ వనరులను దోచుకుంటూ సొంత జేబులు నింపుకుంటున్నారు. ఇది ప్రజల సంపద సృష్టి కాదు, నాయకుల స్వార్థ సంపద సృష్టి." అని వైఎస్సార్సీపీ నేతలు ఆరోపించారు.
రైతు సమస్యలు - పీఏసీఎస్ అవినీతిపై కౌంటర్
ప్రస్తుతం ఖరీఫ్ సీజన్ ప్రారంభమైందని, గతంలో ఎరువుల కోసం రైతులు ఇబ్బంది పడినట్లు కాకుండా, రాబోయే 10-15 రోజుల్లో రైతులకు సకాలంలో విత్తనాలు అందించాలని డిమాండ్ చేశారు. లేనిపక్షంలో రైతులు రోడ్డెక్కి పోరాటం చేస్తారని హెచ్చరించారు.
ఇక పీఏసీఎస్ (PACS) లో రూ. 5.50 కోట్ల అవినీతి జరిగిందన్న ఎమ్మెల్యే ఆరోపణలపై స్పందిస్తూ.. 2005 నుండి అవినీతి జరిగిందని చెబుతున్నప్పుడు, 2014-19 మధ్య టీడీపీ అధికారంలో ఉన్నప్పుడు ఎందుకు విచారణ చేయలేదని ప్రశ్నించారు. ఎన్నికల్లో తమకు సహకరించి, ఇప్పుడు అంతర్గత విభేదాల వల్ల దూరమైన నాయకులపై కక్షసాధింపు చర్యల్లో భాగంగానే ఈ ఆరోపణలు చేస్తున్నారని మండిపడ్డారు.
ప్రజలు అన్ని గమనిస్తున్నారని, కూటమి నాయకులు తమ ప్రశ్నలకు సమాధానం చెప్పిన తర్వాతే నియోజకవర్గంలో పర్యటించాలని వైఎస్సార్సీపీ నాయకులు డిమాండ్ చేశారు. ఈ కార్యక్రమంలో కార్యక్రమంలో జిల్లా అధికార ప్రతినిధి బమ్మిడి దుర్యోధనరావు, పట్టణ వైసీపీ అధ్యక్షుడు శిష్ఠు గోపి,మున్సిపల్ మాజీ వైస్ చైర్ పర్సన్ బోర కృష్ణారావు,మున్సిపల్ వైసీపీ ఉపాధ్యక్షుడు నర్తు రమణ,మున్సిపాలిటీ స్పోక్ పర్సన్ గుజ్జు జోగారావు పాల్గోన్నారు.