ఊడిపడుతున్న స్లాబ్ పెచ్చులు.. ప్రాణభయంతో ప్రయాణికులు.
వర్షం వస్తే బిక్కుబిక్కుమంటున్న ప్రజలు.. వెంటనే మరమ్మతులు చేపట్టాలని డిమాండ్.
క్రైమ్ 9 మీడియా శ్రీకాకుళం జిల్లా అధికార ప్రతినిధి శంకర్ తమ్మినాన.
పలాస, జూలై 4: పలాస మున్సిపాలిటీ పరిధిలోని కాశీబుగ్గ బస్టాండ్ కాంప్లెక్స్ ప్రమాదకరంగా మారింది. భవనం పైకప్పు, మెట్ల భాగాల్లోని స్లాబ్ పెచ్చులు ఊడిపడుతుండటంతో ప్రయాణికులు తీవ్ర భయాందోళనలకు గురవుతున్నారు. చిన్నపాటి వర్షం కురిసినా సిమెంట్ పెచ్చులు రాలుతుండటంతో ఎప్పుడు ఏ ప్రమాదం జరుగుతుందోనన్న ఆందోళన నెలకొంది.
ప్రతిరోజూ వందలాది మంది ప్రయాణికులు, విద్యార్థులు, వ్యాపారులు రాకపోకలు సాగించే ఈ బస్టాండ్లో భద్రతా ప్రమాణాలు పూర్తిగా గాలికొదిలేశారనే విమర్శలు వినిపిస్తున్నాయి. మెట్లపై, వేచిచూసే ప్రదేశాల్లో స్లాబ్ పెచ్చులు తరచూ ఊడిపడుతున్నప్పటికీ సంబంధిత అధికారులు పట్టించుకోవడం లేదని స్థానికులు ఆరోపిస్తున్నారు.
వర్షాకాలంలో పరిస్థితి మరింత ప్రమాదకరంగా మారుతోందని, భవనంలోని పలు చోట్ల స్లాబ్లు బీటలు వారడంతో పెద్ద ప్రమాదం సంభవించే అవకాశం ఉందని స్థానికులు ఆందోళన వ్యక్తం చేస్తున్నారు. ఒకవేళ భారీ స్లాబ్ కూలిపడితే అమాయక ప్రయాణికుల ప్రాణాలు ప్రమాదంలో పడే అవకాశం ఉందని హెచ్చరిస్తున్నారు.
ఇప్పటికే పలుమార్లు పెచ్చులు ఊడిపడిన ఘటనలు చోటుచేసుకున్నా అధికారులు ఎలాంటి శాశ్వత చర్యలు చేపట్టకపోవడంపై ప్రజలు అసంతృప్తి వ్యక్తం చేస్తున్నారు. ప్రమాదం జరిగిన తర్వాత స్పందించడం కాకుండా, ముందస్తుగా భవనాన్ని సాంకేతిక నిపుణులతో పరిశీలించి, ప్రమాదకర భాగాలను తొలగించి అత్యవసర మరమ్మతులు చేపట్టాలని డిమాండ్ చేస్తున్నారు.
"ప్రమాదం జరిగాక స్పందిస్తారా...?"
"ప్రమాదం జరిగాక స్పందిస్తారా..? లేక ఇప్పుడే చర్యలు తీసుకుని ప్రజల ప్రాణాలు కాపాడతారా..?" అనే ప్రశ్న ప్రస్తుతం కాశీబుగ్గ బస్టాండ్కు వచ్చే ప్రతి ప్రయాణికుడి నోట వినిపిస్తోంది. ప్రజల ప్రాణాలకు ముప్పు ఏర్పడకముందే అధికారులు తక్షణ చర్యలు తీసుకోవాలని ప్రయాణికులు, స్థానిక వ్యాపారులు విజ్ఞప్తి చేస్తున్నారు.