పలాస-కాశీబుగ్గలో వైసీపీ ఆధ్వర్యంలో "వెన్నుపోటుకు రెండేళ్లు" నిరసన కార్యక్రమం.
క్రైమ్ 9 మీడియా ప్రతినిధి శ్రీకాకుళం జిల్లా స్టాఫ్ రిపోర్టర్ శంకర్ తమ్మినాన.
పలాస జూన్ 05 :
కూటమి ప్రభుత్వం హామీల అమలులో విఫలమైందని మాజీ మంత్రి సీదిరి అప్పలరాజు విమర్శ
పలాస, జూన్ 5: రాష్ట్రంలో కూటమి ప్రభుత్వం రెండేళ్ల పాలన పూర్తి చేసుకున్న నేపథ్యంలో ప్రజలకు ఇచ్చిన ఎన్నికల హామీల అమలులో వైఫల్యాన్ని నిరసిస్తూ వైఎస్సార్ కాంగ్రెస్ పార్టీ ఆధ్వర్యంలో "వెన్నుపోటుకు రెండేళ్లు" కార్యక్రమం పలాస-కాశీబుగ్గలో నిర్వహించారు. శ్రీనివాసరాజు జంక్షన్ వద్ద జరిగిన ఈ నిరసన కార్యక్రమంలో పార్టీ నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.
ఈ సందర్భంగా మాజీ మంత్రి డాక్టర్ సీదిరి అప్పలరాజు మాట్లాడుతూ, ఎన్నికల సమయంలో ప్రకటించిన సూపర్ సిక్స్ హామీలను కూటమి ప్రభుత్వం పూర్తిస్థాయిలో అమలు చేయలేకపోయిందని ఆరోపించారు. బీసీలకు పెన్షన్లు, నిరుద్యోగ భృతి, రైతులకు ఆర్థిక సహాయం, మహిళలకు ఆడబిడ్డ నిధి వంటి కీలక హామీలు ఇప్పటికీ అమలుకు నోచుకోలేదని విమర్శించారు.
రాష్ట్రంలో ఇసుక, మట్టి, ఖనిజ వనరుల దోపిడీ పెరిగిందని, ప్రజా ఆస్తులను ప్రైవేటీకరణ పేరుతో విక్రయించే ప్రయత్నాలు జరుగుతున్నాయని ఆయన ఆరోపించారు. అభివృద్ధి పేరుతో కొన్ని ప్రాంతాలకు మాత్రమే ప్రాధాన్యత ఇస్తూ మిగతా ప్రాంతాలను నిర్లక్ష్యం చేస్తున్నారని పేర్కొన్నారు.
పలాస నియోజకవర్గంలో మద్యం విక్రయాలపై అదనపు వసూళ్లు జరుగుతున్నాయనే ఆరోపణలు ప్రజల నుంచే వినిపిస్తున్నాయని ఆయన అన్నారు. ప్రజలపై ఆర్థిక భారం మోపే విధానాలను ప్రభుత్వం నిలిపివేయాలని డిమాండ్ చేశారు.
ప్రజా సమస్యలపై వైఎస్సార్ కాంగ్రెస్ పార్టీ నిరంతరం పోరాటం కొనసాగిస్తుందని, ప్రజా వ్యతిరేక నిర్ణయాలను ఎప్పటికప్పుడు ప్రశ్నిస్తామని మాజీ మంత్రి స్పష్టం చేశారు.
కార్యక్రమంలో పలాస మండలం, పలాస-కాశీబుగ్గ మున్సిపాలిటీకి చెందిన పార్టీ నాయకులు, ప్రజాప్రతినిధులు, కార్యకర్తలు పాల్గొన్నారు.