మందస మండలంలో ఘనంగా ఎన్టీఆర్ జయంతి వేడుకలు – ముఖ్య అతిథిగా హాజరైన పలాస సమన్వయకర్త వెంకన్న చౌదరి.
క్రైమ్ 9 మీడియా ప్రతినిధి శ్రీకాకుళం జిల్లా స్టాఫ్ రిపోర్టర్ శంకర్ తమ్మినాన.
పలాస/మందస:
తెలుగు ప్రజల ఆరాధ్యదైవం, తెలుగుదేశం పార్టీ వ్యవస్థాపకులు, స్వర్గీయ నందమూరి తారకరామారావు (ఎన్టీఆర్) జయంతి వేడుకలు పలాస నియోజకవర్గం మందస మండలంలో అత్యంత వైభవంగా జరిగాయి. మండలంలోని హరిపురం, బాలిగాం మరియు మందస టౌన్లలో పార్టీ శ్రేణులు, అభిమానులు ఈ వేడుకలను పండుగ వాతావరణంలో నిర్వహించారు.
ఈ కార్యక్రమాలకు పలాస నియోజకవర్గ సమన్వయకర్త శ్రీ వెంకన్న చౌదరి గారు ముఖ్య అతిథిగా హాజరయ్యారు. ఆయా ప్రాంతాల్లో ఉన్న ఎన్టీఆర్ విగ్రహాలకు ఆయన పూలమాలలు వేసి, ఘనంగా నివాళులర్పించారు. ఈ సందర్భంగా శ్రీ వెంకన్న చౌదరి గారు మాట్లాడుతూ.. తెలుగు జాతి ఖ్యాతిని ప్రపంచవ్యాప్తం చేసిన మహోన్నత నాయకుడు ఎన్టీఆర్ అని కొనియాడారు. ఆయన ఆశయ సాధనకు ప్రతి ఒక్కరూ కృషి చేయాలని పిలుపునిచ్చారు.
అనంతరం కార్యకర్తలు, నాయకులు పెద్ద ఎత్తున "జోహార్ ఎన్టీఆర్", "ఎన్టీఆర్ అమర్ రహే" అంటూ చేసిన నినాదాలతో మందస మండలం మారుమోగింది. ఈ వేడుకల్లో గ్రంథాలయ చైర్మన్ విఠల్ గారితో పాటు మందస మండల ముఖ్య నాయకులు, అనుబంధ సంఘాల ప్రతినిధులు, మరియు భారీ సంఖ్యలో పార్టీ కార్యకర్తలు, ప్రజలు పాల్గొని కార్యక్రమాన్ని విజయవంతం చేశారు.